Bugun Sirdaryo viloyati hududiy saylov komissiyasiga MDH kuzatuvchilari missiyasi faoliyatini qo‘llab-quvvatlash bo‘limi maslahatchilari Marina Afonina hamda Denis Varganovlar viloyatda saylovga tayyorgarlik jarayonlari qay darajada olib borilayotgani bilan tanishish maqsadida tashrif buyurdi.  

Xorijiy kuzatuvchilar Sirdaryo viloyati hududiy saylov komissiyasi raisi Zafar Xakimov bilan muloqot qilib, saylovga tayyorgarlik jarayonlari, bu galgi saylovlarning o‘ziga xos jihatlari, bunda hududiy saylov komissiyasining vazifalari, saylov komissiyalari a’zolarini o‘qitish jarayoni, saylovchilar ro‘yxatini shakllantirish, ovoz berishni o‘tkazish uchun ko‘rilayotgan tayyorgarlik, ayni paytda siyosiy partiyalar tomonidan saylovoldi tashviqotini olib borish uchun yaratilgan sharoitlar yuzasidan o‘zlarini qiziqtirgan savollarga javob oldilar.

Shundan so‘ng xalqaro kuzatuvchilar hududiy saylov komissiyasi raisi Z.Xakimov hamrohligida hududlarda tashkil etilgan saylov uchastkalarini ko‘zdan kechirish maqsadida Boyovut tumani "Mirishkor" mahallasi 2-sonli kasb-hunar maktabi binosida tashkil etilgan 51 saylov uchastkasi, Yangiyer shahridagi “Ma’rifat” MFYdagi Toshkent kimyo texnologiyalari institutining Yangiyer filiali binosida tashkil etilgan 41- saylov uchastkasi, Shukroni MFYda ixtisoslashtirilgan maktab binosidagi 36-saylov uchastkasi hamda Guliston shahridagi Xalima Hudoyberdiyeva ijod maktabidagi 15-saylov uchastkalarida bo‘lib ularning ish faoliyati hamda yaratilgan shart-sharoitlar bilan tanishdilar.